IET, 20 bagong inhenyero

Ni John Mark Forcado

Umarangkada ang Institute of Engineering and Technology (IET) matapos makapagtala ng panibagong bilang ng mga inhenyero. Sa magkasunod na PRC Licensure Examination na isinagawa noong Abril at Mayo taong kasalukuyan, tatlo sa limang kumuha ng eksamin para sa Mechanical Engineering ang pinalad na makapasa. Nasa hanay ng mga inhenyerong ito sina Engr. Jomer Galiga Fano, Engr. Abraham Banuelos Demura, at Engr. Boyet Fallan Montoya. Umabot ng 60% ang passing rate na natamo ng Romblon State College kumpara sa 56.66% na sa national passing percentage.

Samantala sa hanay ng mga bagong gradweyt ng Civil Engineering na nagsipagtapos at kumuha ng Civil Engineering Examination ay pito (7) naman ang nakapasa at sa ngayon ay titulado na bilang mga lisensyadong Civil Engineer. Kabilang sa mga nakapasa sina Engr. Ramon D. Arguelles, Engr. Alphine A. Ariola, Engr. Enrico Dampil III, Engr. Shirley F. Fajarito, Engr. Paolo M. Morada, Engr. Noel M. Mortel at Engr. Juliet Musa.

Noong Nobyembre 2008 nakapagtala din ng anim pang mga bagong civil engineer ang RSC na sina Engr. Jerome A. Bernales, Engr. Adrian B. Fajanilan, Engr. John Mark F. Formilos, Engr. Hanzel F. Fruelda, Engr. Jerome S. Maestre at Engr. Edrian C. Reyes.
Ika-14 hanggang 15 ng Setyembre ng taong kasalukuyan ang PRC Manila ay nagsagawa ng Electrical Engineering Board Exam at sa muli ang instituto ay nagpakitang gilas sa pamamagitan ng mga tinaguriang mga bagong enhinyero ng taon na kinabibilangan nina Engr, Mark Joseph Cuasay Alegre, Engr. Jason Frogosa Fortunato, Engr. Riolisa Fesarillio Odiver, at Engr. Mark Joseph Fetalver Soledad.

Ito’y indikasyong hindi nagpapahuli ang Instituto ng Enhinyera at Teknolohiya sa mga licensure examination at tunay na nagsusumikap na makapagtala ng mga propesyunal na maipagmamalaki ng Romblon State College at ng probinsya.■ Read more...

Enrolment tumaas ng 20%; BSIT pinakamarami pa rin

Ni Jhelanie Manas

Ayon sa talaang inilabas ng Office of the Registrar, ang populasyon ng RSC ngayong unang semestre ng taon ay umakyat sa kabuuang bilang na 6, 244 (kabilang lahat ng campuses maliban sa hayskul). Umakyat ito ng halos 20% o katumbas ng 1,055 bilang ng estudyante kung ikukumpara noong nakaraang unang semestre na nakapagtala lamang ng bilang na 5,189.

Ang RSC Main Campus ang nanguna sa record sa kabuuang bilang na 3,560. Muling nakuha ng Institute of Engineering and Technology (IET) ang unang pwesto ng talaan sa bilang na 1,637 o katumbas ng 46% sa kabuuang populasyon sa Main Campus (binubuo ng lahat ng kursong pangkolehiyo). Ang Institute of Business and Accountancy (IBA) ay pumangalawa sa hanay sa pagkalahatang bilang na 797 o katumbas ng 22%.

Sinundan ito ng Institute of Arts and Sciences (IAS) na may 493 at nakamit ang 14%. Kapansin-pansin ang naging pagbagsak ng populasyon ng IAS dahil sa pagbabalik ng mga estudyanteng nasa ilalim ng General Curriculum sa kanilang mga respektibong instituto.

Nakapagrehistro naman ang Institute of Professional Studies and Teacher’s Education ng 13% o 466 bilang ng mga estudyante. Binuo ng Institute of Agriculture, Fishery and Forestry ang kabuuang bahagdan sa bilang na 167 o kabuuang 5%.

Kung pagbabatayan ang nakapagtala ng pinakamaraming bilang sa bawat kurso, muling nanguna ang BS Information Technology (BSIT) na nagtala ng kabuuang bilang na 715. Nasa ikalawang pwesto pa rin ang BS Business Administration (BSBA) na nakapagtala naman ng 420. Ang BS Civil Engineering (BSCE) ang sumunod sa bilang na 324 at 304 naman sa BS Hotel and Restaurant Management (BSHRM); AB Polsci, 282; BEED, 219; BSEE, 165 at BSME, 158.

Dagdag pa rito, ang mga satellite campuses tulad ng RSC Sawang, Romblon ay umabot ng 825. Ang Sibuyan Branch ay nakapagtala ng 1,042 bilang na nahahati sa dalawang campuses, ang San Fernando at Cajidiocan sa kabuuang dami na 738 at 304. Ang Tablas Branch na nakapagtala ng bilang na 817 ay nahahati sa San Andres Campus, 158; Calatrava Campus, 215; San Agustin, 179; Sta. Maria Campus, 121 at Sta. Fe Campus, 144. ■ Read more...

RSC 50% ang passing rate sa CPA board exam

Ni Aljohn Mangaya

Tatlong bagong akawntant ang nadagdag sa talaan ng mga CPAs ng Romblon State College. Ito ay batay resulta ng Certified Public Accountant Licensure Examination (CPALE) na ginanap noong Mayo 11, 12, 18 at 19, 2009. Sila ay sina Anabhel Lilang Velasco, Jubeth Fernando Cawaling at Cristy Marie Hije.

Sina Velasco, Cawaling at Hije ay parehong nagtapos ng kursong 2008. Sa anim na kumuha at sumubok sa naturang eksaminasyon, silang tatlo ang nakapasa at kumakatawan sa 50% passing percentage ng RSC. Ang porsyentong ito ay higit na mataas kumpara sa national percentage na 28.88% (1,231/4,262).

Ang pagkakaroon ng 50% passing rate sa CPALE ay isa sa mga layuning makamit ng BS Accountancy Program. Kaugnay nito, isang testimonial lunch na dinaluhan ng mga magulang at sumusuporta sa Adopt-a-CPA Reviewee Project ng IBA ang inihanda ng sa pakikipagtulungan ng administrasyon ng RSC upang parangalan ang matagumpay na mga examinee.

Naging madamdamin ang mga karanasang isiniwalat ng mga bagong CPA lalo na ng sinabi ng isang magulang ang pagpapakatulong nya para lamang mapaaral at maging CPA ang kanyang anak.

Sa kasalukuyan, ang tatlo ay may kanya-kanya nang trabaho sa mga kilalang auditing firms. Si Cawaling na tubong Budiong, Odiongan ay nagtatrabaho sa R.S. Bernaldo and Associates bilang Associate Auditor. Si Velasco naman na taga-Budiong din nasa Manabat and San Agustin Co. sa Makati bilang Associate Auditor at si Hije naman na tubong Corcuera at alumnay ng Harrow ay nasa Head Office ng Puregold Club, Incorporated sa Ermita, Manila bilang AP Specialist at Inventory Auditor.■ Read more...

IET nagdaos ng seminar sa Research, Extension Capability

Ni Keycel F. Fejer at Edg Bea Ferrera

“Goal Setting, Research and Extension Capability Seminar-Writeshop”. Ito ang tema ng seminar na dinaluhan ng lahat ng miyembro ng mga guro at piling estudyante ng Institute of Engineering and Technology (IET) noong Hulyo 22-24 sa RSC Audio Visual Room (AVR).

Ang workshop seminar ay tugon sa pangangailangan ng mga estudyanteng nakaenrol sa pananaliksik mula sa departamentong CE, ME at EE.

Ipinaliwanag ni G. Ernesto Foja ang rationale at mechanics ng gawain sa unang araw ng seminar. Iprinesenta naman ni Engr. Amada S. Mayuga ang pormat ng ulat ukol sa OJT ng IET. Sina Dr. Alexander Formento, G. Eddie Fetalvero at G. Tomas Faminial ay parehong nagbahagi sa Institutional RDE Format Application ng Research at Extension. Si G. Faminial ang huling nagleksyon tungkol sa pagpapaunlad ng paksa, tema o titulo ng gagawing proyekto. Nagbigay din siya ng mga gabay sa pangkalahatang pagsusulat.
Sa ikalawang araw, si G. Lou Foja ang naatasang magsalita ukol sa pinansyal na pagpaplano at paghahanda ng badyet sa proyektong sasaliksikin. Dumalo rin ang iba’t ibang director, OIC, at kinatawan ng Kagawaran ng Agrikultura, DENR, DOST, DTI, DOLE para ipresenta at ibahagi ang mga maaaring saliksikin at pag-aralan sa kanilang departamento.

Samantala, si Dr. Merian Mani at Mrs. Rebecca Gervacio naman ay naglektyur ng Agenda Setting sa Research Development and Extension (RDE).

Nagtapos ang tatlong araw na seminar sa pagbibigay ng repleksyon at komentaryo sa bawat isa. Ang pangkalahatang tagapamahala ng seminar ay sina G. Ernesto Foja na siya ring Research and Extension Coordinator ng IET at Gng.Ana S. Fajanilan kaakibat nila ang kooperasyon ng mga guro at estudyante ng IET.■ Read more...

RSC R&D Management paper, poster wagi sa nat'l contest

Ni Jeofel m. Almoheda

Nakamit ng mga mananaliksik ng Romblon State College (RSC) ang grandiyosong WC Medrano Award para sa Best R&D Management Paper at Poster na ginanap sa ika-19 na kombensiyon ng prestihiyosong Philippine Association of Research Managers (PHILARM) noong ika-21-24, 2009 sa Megrande Ocean Resort, Talomo, Davao City.

Ang WC Medrano Award para sa papel at poster ng RSC ay ang kauna-unahang napagwagian ng kolehiyo sa antas nasyonal sa larangan ng riserts na naghatid ng mataas na puntos para sa institusyon. Ang PHILARM ay isa sa mga pinakamalaking asosasyon ng mga mananaliksik sa bansa.

Ang nagwaging papel ay may pamagat na “Research Capability Building – A Strategy to Promote Research Culture in the SUCs and Countryside Development: The RSC Experience” kung saan ang pangunahing awtor ay si Dr. Merian Catajay-Mani, RSC Director for Research, kasama sina Eddie Fetalvero, IBA Research Coordinator; Lou Foja, RSC Director for Budget and Finance; at Dr. Alexander Formento, VP for Research, Development and Extension.

Kasama rin si Dr. Mario A. Fetalver, Jr., Dekano ng IPSTED, sa mga mananaliksik ng RSC na nagprisinta. Ang kanyang papel ay may pamagat na “Determinants of Strengthened Research Capability and Fostered Research Culture in State Higher Education Institutions in the Region”.

Eksperto at batikan sa pananaliksik ang mayorya sa mga awtor ng competing papers sa PHILARM ngunit umangat ang papel mula sa RSC. Napili ito sa unang tatlo at sa kalauna’y napili bilang Best R&D Paper at Poster ng taon . Ang papel ay iprinisinta ni Dr. Mani at ang poster naman ay iprinisinta ni G. Fetalvero. Nilalaman ng papel at poster ang karanasan ng RSC sa aspetong pananaliksik mula 1980 hanggang 2007 at ang mga hakbanging ginawa upang mapalakas ang kultura ng pananaliksik sa kolehiyo.

Pagbabalik-tanaw sa RSC-RDE

Sa pagrerepaso ng mga lumang papel ng RSC RDE Unit mula 1980, napag-alamang tanging agrikultura ang pokus ng mga research papers dito, wala ni isa mang puntos ang naitala ng kolehiyo para sa RD, papalit-palit ang lider sa yunit at kakaunti lamang ang mga aktibong mananaliksik ng kolehiyo. Isa pang pangunahing problema na kinaharap noon ay ang kakaunting aktibong researchers at kapos na pondo.
Ito ang humimok at nagpasigla sa RD Unit upang mag-environmental scanning. Layunin nito ang makapagpalitaw ng mga mahuhusay na mananaliksik sa kolehiyo kapwa sa main at satellite campuses. Naging daan din ito upang makapaglatag ng aakmang sistema para sa yunit, mapalawak ang tema ng mga panukalang papel at upang makakalap ng sapat na pondo.

Kaya upang mapalago at maitaguyod ang kultura ng pananaliksik sa kolehiyo, sinimulang makipag-ugnayan at manalamin ng RSC sa iba’t-ibang SUCs na may matibay na pundasyon sa riserts. Ilan sa mga tumulong ay ang Southern Tagalog Agriculture Research Resource Development (STARRDEC), PHILARM, at CHED-UPLB-Zonal Research Center. Kasabay nito ang interbensiyon sa kolehiyo at pagsasagawa ng mga hakbanging tatasa sa pagsulong ng RSC RDE. At unti-unting sinimulan ang inkulturasyon para sa kompetibong mananaliksik.

Ang Nat’l Environmental Summit at ang IBA Research Symposium

Ang kauna-unahang inisyatibo bilang sagot sa hamon ng pag-angat ng antas ng riserts ay sinimulan ng RDE Unit sa pamamagitan ng pag-isponsor ng mapanghamon at kauna-unahang National Environmental Summit na hinawakan at inorganisa noong nakaraang taon. Dinaluhan ito ng mga interesado at mananaliksik mula sa iba’t ibang SUCs at ahensya ng gobyerno. Sa puntong ito’y nagkaroon ng kauna-unahang anim na puntos ang kolehiyo sa R&D. Dito rin ang unang pagkakataong maparangalan ang RSC ng Best Paper. Ang nagwaging papel ay may pamagat na “Validation of Instructional Materials for Environmental Education” ni Dr. Merian Mani.

Pagkaraan nito ay nagsagawa naman ang Institute of Business and Accountancy (IBA) ng Research Symposium noong October 6, 2008. Matagumpay itong naidaos sa pakikipagtulungan ng RSC RDEC. Nagbukas din ito ng mas malaki at malapad na pinto para sa kolehiyo. Lumutang dito ang mga mahuhusay na papel at magagaling na mananaliksik ng kolehiyo gaya ng kay Dr. Mario A. Fetalver na may pamagat na “Proposed Research Program for Institutional Development” at ang papel ni Engr. Jayson F. Rufon na “Eligibilty and Employability of RSC Civil Engineering Graduates from 2001-2007”.

RSC sa Global na Kumbensyon

Lumawak na ang tinatahak ng kolehiyo at maging ang mga Internationsl Convention ay ‘di pinalampas. Ang una ay ang International Women’s Conference na inisponsoran ng Theresian International sa Bangkok, Thailand. Dinaluhan ito ni Dr. Merian Mani at siya rin’y nagprisinta ng kanyang papel na may pamagat na “Plight of Filipino Women in the Rural Community”.

Ang research poster naman ni G. Eddie Fetalvero na may pamagat na “Environmental Education Integration through Assesment tasks and Rubrics” ang kanyang iprinisinta sa International Conference on Science and Math Education sa UP NISMED.
Ngayong Oktubre, magpiprisinta rin si Dr. Mani sa Middle East ng kanyang papel na may pamagat na “Women Across Culture: Finding Frontiers for Establishment, Reinforcement and Improvement of Family”.

Naniniwala ang pamilyang RSC RDE na magpapatuloy ang oportunidad na makapagpresenta hindi lang sa loob ng bansa kundi maging sa buong mundo.

Wagi ang RSC-RDE ngayon

Ang dating kimi at tahimik na RSC RDE ay unti-unting nagkakumpiyansa at nakilala ng iba pang SUCs at NGOs. Nakapagtaguyod ito ng mapanghikayat at interesanteng atmospera’t kultura para sa pananaliksik.

Kung noon’y kapos na kapos ang pondo ng RSC RDE, ngayon’y milyones ang pondong nakalaan para sa mga mahuhusay na mananaliksik ng kolehiyo. Ilan dito ay ang P7M mula sa National Economic Development Authority (NEDA), P6M galing sa PCARRD, P3M mula sa Department of Agriculture at ang P2M galing sa FIDA maliban pa sa libu-libong pondo galing sa iba pang ahensya ng gobyerno gaya ng DTI, DOST at at maging mula sa Congressional Development Fund.

Naging epektibo ang Research Capability Building na isinagawa ng kolehiyo sa masipag at magaling na pamumuno ng RSC Research Director na si Dr. Merian Catajay-Mani. Ang pag-iistimula sa mga bibihirang manaliksik at ang pagtaguyod ng linkaging, mentoring at patuloy na programa para masustina ang momentum ng pananaliksik sa kolehiyo ay naging epektibo.

Sa panayam ng The Harrow kay Dr. Mani, isa sa mga idiniin niya ay ang walang-kaimbutang pagbabahagi ng mga natatanging kaalaman at kasanayan sa pananaliksik para sa mga may potensyal. Mahalaga rin ang pagkakaroon ng competent staff at ang sapat na pondo para sa yunit.

RSC, modelo para sa ibang SUCs na mahina ang R&D Unit
Ang karanasan ng RSC sa kanyang pagtahak sa mapanghamong daan ng pananaliksik at ang mga hakbanging isinagawa upang mapalakas at maitaguyod ang de-kalidad na programa para sa R&D ay hindi naganap sa loob ng isang gabing proseso. “Napakahalaga ng collective efforts,” ayon kay Dr. Mani.

Pinaplano rin ng CHED na gawing modelo ang karanasan at hakbanging ginawa ng Romblon State College upang maiangat ang antas ng research ng ilang SUCs na may mahinang RDE Unit. Ang karanasang ito ang naging tuntungan upang maparangalan ang mga RSC researcher ng prestihiyosong WC Medrano Award. “Do not settle for less, always settle for excellence,” pagwawakas ni Dr. Mani, PHILARM awardee.■
Read more...

4 sa bawat 10 estudyante, diskumpiyado pa rin sa kalidad ng edukasyon sa RSC

Ni Ma. Sheilamae Gonzales

Maraming mga eskwelahan ngayon ang nagbibigay ng magandang edukasyon sa kanilang mga estudyante na kung saan ito ang nagiging daan tungo sa ganap at matagumpay na propesyon ng mga mag aaral sa kolehiyo.

Isa ang RSC sa humuhubog at lumilinang sa kakayahan ng mga estudyanteng nagiging bahagi nito. Ngunit marami pa rin sa mga estudyante ng paaralang ito ang nagdududa sa kakayahan nitong linangin ang kaisipan nila patungo sa isang matagumpay na kinabukasan.

Sa isang pagtatayang isinagawa ng patnugutan ng The Harrow (TH), isa sa mga katanungan ay kung ‘Satisfied ba sa kalidad ng edukasyon ang mga estudyante ng RSC?’ Ito ang katanungang inilabas ng patnugutan upang malaman kung gaano kataas ang antas ng edukasyon sa paaralang ito.


Sa kabuuan, 43 porsyento (43%) o apat sa bawat sampung mga estudyante ang nagsasabing hindi sila satisfied sa kalidad ng edukasyon sa RSC. Para sa kanila, kulang pa ang mga libro sa library. Maging ang mga instructors ay kulang din kaya kadalasan napapagod na kaagad ang mga ito sa pagtuturo. May mga instructors din na hindi competent sa larangan ng kanilang tinuturo.

Tatlumpo’t walong porsiyento (38%) naman ng mga estudyante ang nagsasabing satisfied na sila sa kalidad ng edukasyon sa RSC. “Marami na sa kasalukuyan ang nangunguna sa mga board exams na galing dito sa ating institusyon,” saad ng isang estudyante patungkol sa tanong na ito. At ayon naman sa mga estudyante sa sekundarya, “Opo, kasi advance na ang mga natutunan naming mga high school students.”

Labindalawang porsiyento naman (12%) ang hindi sigurado sa kalidad ng edukasyon sa paaralang ito. Ayon sa kanila, may mga part-time instructors na hindi pa gaanong bihasa sa pagtuturo kaya hindi mahimok ang mga estudyante na mag-aral at matuto.
Pitong porsiyento (7%) ng mga estudyante ang hindi nagkumento patungkol sa tanong na ito na karamihan ay freshmen. Ayon sa kanila, wala silang masabi sa isyung ito sapagkat wala pa silang masyadong kaalaman sa mga estratehiya ng pagtuturo sa paaralang ito.

Napag-alaman din na marami pang kakulangan ang paaralan upang makamit ang misyon nitong de-kalidad na edukasyon.

Ito ang nakalap ng patnugutan mula sa 104 estudyanteng sumali sa sample survey na ito na sistematikong pinili upang maging batayan ng pangkalahatang pulso ng mga sektor ng estudyante. ■ Read more...

Pres. Sespeñe kinasuhan ni VP Formento

Ni Jeofel m. Almoheda

Dahil sa patong-patong na anomalyang kinasasangkutan diumano ni Dr. Jeter S. Sespeñe, pangulo ng Romblon State College (RSC), anim na magkakahiwalay na kasong kriminal at administratibo ang isinampa laban sa kanya sa tanggapan ng Ombudsman sa Maynila noong Setyembre 4, 2009.

Ang naghain ng reklamo kontra sa Pangulo ay si Dr. Alexander F. Formento, ang Vice President for Research, Development and Extension ng kolehiyo. Ang reklamo ay hinggil sa maanomalyang mga transaksyon at proyektong iniuugnay sa Pangulo.

Batay sa nakuhang kopya ng Sworn Complaint, ang unang kaso ay ang paglabag diumano sa RA 3019 o ang Anti-Graft and Corruption Practices Act at paglabag sa itinadhana ng RA 9184 o ang Government Procurement Reform Act. Ito ay hinggil sa kaduda-dudang pagbili ng segunda-manong school bus sa presyong P1,272,000.00 sa halip na bagong bus ayon sa naaprubahan ng Board of Trustees (BOT). Base parin sa demanda ni Formento, ang halaga ng nabiling bus sa Donghae Corporation ay P950,000 lamang umano kung kaya’t labis ang ibinayad o overpriced ang pagkabili sa nasabing sasakyan maliban sa wala rin umanong naganap na kompetibong public bidding.

Sa panayam ng The Harrow (TH) kay Dr. Formento noong Set. 25, idinagdag niyang nang minsang gamitin ang bus, ito’y tumirik sa kahabaan ng Brgy. Rizal. Delikado aniya ang mga ganoong pangyayari dahil paano na lamang kung sakaling sa field trip ng mga estudyante mangyari ang ganoon at magkataong nasa paanan ng Baguio City?

Nang kunin naman ng TH ang panig ni Dr. Sespeñe, sinabi niyang ang pagbili ng bus ay tugma sa resolusyong ipinasa ng dating pamunuan ng SSC at FSSC na ang Pangulo pa’y si Mark Alegre, at ang transakyon ay pumapabor sa mga estudyante at kolehiyo. Ipinahiwatig din niyang walang anomalyang naganap sa transaksyong iyon taliwas sa paratang ni Formento.

Ang Lima pang Maiinit na mga Kaso

Paglabag naman sa Section 3 (e) ng RA 3019 at probisyon ng RA 9184 ang ikalawang kaso laban sa Pangulo. Ito ay kaugnay sa umano’y kwestyunableng pamimili ng kagamitan para sa Banana Tissue Culture Laboratory Project ng RSC. Tanging canvassing at hindi sa pamamagitan ng public bidding umano dumaan ang transaksyon. Idinagdag din ang kaduda-dudang pagkapanalo umano ng CORE Scientific Industries sa canvassing sa halagang P1,180,698 samantalang ang presyong inialok ng SPC Company na kasali rin sa canvass ay P1,125,555 lamang. May mga paunang-bayad din umano ang RSC ayon sa O.R. No. 5662 kahit na walang pahintulot sa Opisina ng Pangulo ng Pilipinas ayon na rin sa itinadhana ng Seksyon 88 ng Presidential Decree 1445.

Ang ikatlong kaso ay kaugnay sa nabiling 115 ektaryang lupa ng RSC sa Barangay Agpudlos, San Andres sa pamilya Martinez. Ayon sa reklamo, si Dr. Sespeñe diumano ang personal na nangasiwa sa transaksyon at nagkaroon ng 1.8 at 3 ektaryang lupa roon ang Pangulo at ang kanyang biyenan pagkatapos ang bayaran ng lupa ng RSC. Ayon sa reklamo, paglabag sa Seksyon 3 (e) ng RA 3019 ang pagtanggap ng Pangulo ng direktang benipisyo galing sa lupa ng mga Martinez.

Pagpalsipika ng mga dokumento (falsification of public document) ng isang opisyal ng gobyerno naman ang ika-apat na kakaharaping kaso ni Dr. Sespeñe sa Ombudsman kung sakaling ang reklamo ay mapag-alamang prima facie. Batay pa rin sa reklamo, namahagi ang Presidente ng Office Order No. 3-B series of 2008 na may petsang Hunyo 26, 2008 samantalang ang totoo umano’y kakagawa lamang ng order salungat sa petsang nakasaad. Ang nasabing order ay nag-uutos na magbuo ng isang Bids and Awards Committee para sa RSC.

Idinagdag pa na ang order ay ginamit daw na pansuportang dokumento sa isinagawang ebalwasyon ng Commission on Higher Education (CHED) Evaluation Committee sa performance ni Dr. Sespeñe bilang Presidente na sa kalauna’y itinalagang muli bilang pangulo noong Hulyo 24 ayon sa malakas at walang-tutol (unanimous) sulat-rekomendasyon ng CHED noong Hulyo 21.

Ikalimang kaso na inihabla laban sa Pangulo ay tungkol sa paglabag daw nito sa Code of Conduct and Ethical Standards of Public Officials and Employees. Ayon sa reklamo, sinuway umano ni Dr. Sespeñe ang pamantayan at tamang asal bilang isang opisyal ng publiko nang siya’y hindi umano nagdahan-dahan sa pagsasabing ‘Saan napunta ang pera?’ na ang tila kinukwestiyon ay si Dr. Formento noong kapanayamin ng pahayagang RSun hinggil sa isyung pagbagsak ng RSC Cooperative sa pamamahala raw ni Dr. Formento. ‘…his cause to be published were calculated to induce the readers to suppose and understand that I am guilty of certain offenses…’ ayon sa bahagi ng reklamo ng huli.

Ang huling kaso ay batay sa Annual Audit Report ng Commission on Audit (COA) of 2007 na inilabas noong Pebrero 2006 at sa COA Report 2008 na inilabas noong Oktubre 20, 2006 para sa RSC na kung saan ay may nilabag umanong PD 1445 o Malversation of Public Funds at RA 9184 o ang Government Procurement Reform Act.

Ano ba ang iyong motibo?

May direktibang ibinigay si Dr. Sespeñe kay Dr. Formento base sa Memorandum No. 319, S. 2009 para ipaliwanag ang intensyon o motibo ng huli sa paghahain ng kaso sa Ombudsman laban sa una.

Ayon sa nakuhang kopya ng TH sa sagot ni Dr. Formento, kanyang sinabi na ‘The intention in filing the case against the RSC President with the Office of the Ombudsman is summarized as: In paramount interest of transparency, accountability, good governance, and justice for all. That is the constitutional responsibility of every citizen of this democratic country.’

‘My office is always transparent.’

Isa lamang ito sa mga pahayag ni Dr. Sespeñe sa pangkalahatang komperensiya ng RSC faculty and staff noong Set. 23, 2009 na ginanap sa bahay-aklatan ng kolehiyo. Tinukoy niya rito ang mga akusasyon ni Formento. ‘And I know, there are seven dwarves here who are against me…’ na ang tinutumbok naman ay ang iba pang mga kasamahan daw ni Formento sa paglabas ng mga alegasyong nakasisira sa pagkatao ng Pangulo, sa integridad ng kanyang pamilya at maging sa imahe ng RSC.

Kapansin-pansin din ang hindi pagdalo ni Dr. Formento sa nasabing komperensya kung saan ay may mga patama ang Pangulo tungkol sa mga kasong isinampa laban sa kanya. Nang tanungin naman ng publikasyong ito si Dr. Formento kung bakit wala siya sa komperensya, sinabi niyang pinaunlakan niya ang naunang paanyaya (Set. 14) ng RNHS para sa STEP Competition sa hayskul sa halip na sa sulat-pabatid na ipinadala lamang noong araw din mismo ng komperensya (Set. 23).

Naging madamdamin ang Pangulo sa mga oras na iyon at nagsalita rin siya hinggil sa paglimbag ng mga balita sa diyaryo na hindi man lang kinuha ang kanyang panig kung kaya’t nagkaroon ng media judgment and conviction. At sa huli’y sinabi niyang ‘Nangyari na yan. Let’s face the reality. I am open to that.’

Samantala, nang mainterbyu ng TH si Dr. Sespeñe noong Set. 24, sinabi niyang hindi pa siya nakakatanggap ng subpoena mula sa opisina ng Ombudsman kung kaya’t hindi pa siya makakapagbigay ng pormal na pahayag hinggil sa mga naturang kaso.

Idiniin din ng Pangulo na bakit hindi muna sa Grievance Machinery inilagak at pag-usapan ang anumang gusot sa loob ng institusyon imbes na deretsahang ihatid sa Ombudsman. Isa pa’y papaano umanong magkakaroon ng anomalya sa bawat transakyon gayong wala naman siyang natatanggap na reklamo o puna mula sa awditor ng kolehiyo. Nabanggit din niya na dapat iukol ang nararapat na respeto at paggalang para sa isang may awtoridad na kagaya niya.

‘I am respecting him as my superior’

Ito naman ang naging tugon ni Dr. Formento sa panayam ng TH sa kanya, “I have no grievance with anybody. Grievance bang matatawag na gusto mong malaman ang truth beyond these issues? Tsaka hindi ‘yan sakop ng grievance machinery dahil ang dinadala diyan ay tungkol sa employment, promotion, condition of workers in workplace at quarrel of employees or employer to employees. Hindi naman kami nag-aaway. Pag nagsampa ka ng kaso with evidence, is that an indication that I am disrespectful? Now, I am giving him a chance in court to prove that these issues are not true.’

Kamusta ang RSC?

“Salungat sa sinasabing ang isyu at kasong isinampa ay nakasisira sa imahe ng RSC, ang aksyong tulad ng ganito ay makakabuti sa ating kolehiyo in the long run. Makakabuti dahil tiyak magsisilbi itong babala sa mga kinauukulan upang sa malinis at maayos na pamamaraan, at ayon din sa itinakda ng batas at alituntunin tumakbo ang ating kolehiyo.” ang huling pahayag ni Dr. Formento.■
Read more...

RSC to RSU sigurado na!

Ni Frederick Kin Fajiculay

Matapos ang halos isang dekadang paghihintay sa kumbersyong pang-unibersidad, sa wakas ay makakamtan na rin ng mga Romblomanon ang kanilang inaasam na pagbabago para sa nag-iisang kolehiyo ng probinsya.

Matatandaan na taong 1999 pa nang unang ipakikilala ang planong kumbersiyon sa Romblon State College. Ito ay matapos ang pagbisita ni Congressman Dante Liban sa kolehiyo at mabuo ang House Bill 3265 na isinulong at ipinaglaban sa 11th Congress. Sa pamamagitan ng panukalang batas na ito, na sa kinalaunan ay pinalitan ng House Bill 1201 ay nakilala ang Romblon State College bilang isang institusyong pang-edukasyon sa lalawigan ng Romblon na nag-aasam ng kumbersyon. Subalit, dahil na rin sa ‘di inaasahang pagkakataon ay hindi nabigyang katuparan ang mga nasabing panukalang batas. Kahit na ito’y pinalad na makaabot sa Senado ay naging kulang pa rin para makabuo ng isang unibersidad sa lalawigan ng marmol.

RSU Bill sa Senado

Sa pagpupursige ng mga nagsulong ng HB 5217, (binagong bersyon ng HB 1201) ay naipasa na rin sa wakas ang RSU Bill sa Mababang Kapulungan at maging sa Senado. Ika-26 ng Abril nang buong puwersa at sama-samang magpunta ang kinatawan ng RSC maging ang mga lider ng lalawigan sa Senado upang suportahan ang pagdinig ng HB 5217 sa Committee on Education Culture and Arts na pinangunahan ni Senador Mar Roxas at Committee on Finance, kung saan naipasa ang panukalang batas, matapos magkaroon ng MOA ang CHED at RSC.

Matapos na ito’y maipasa sa mababang kapulungan, tuloy-tuloy at naging mabilis ang pag-usad nito sa Senado. Napasama ang RSU bill sa mga dininig na mga panukalang batas sa buong buwan ng Agosto 2009.

Dito rin, kung saan ito’y naging Senate Bill 3079, naging sponsor sina Sen. Mar Roxas, Sen. Francis Escudero, at Sen. Edgardo Angara.

Maliban sa ilang minimal na pagbabago at pag-amyenda ay tuluyang naipasa sa ikatlong pagbasa ang RSU Bill sa Senado noong ika-18 ng Agosto, 2009.

RSC to RSU

Pinal nang inaprubahan sa Ikatlong Regular na Sesyon ng 14th Congress ang batas na ito noong ika-27 ng Hulyo, 2009 na pumasa rin sa sunud-sunod na pagsusuri ng Mababang Kapulungan at ng Senado noong ika-18 at ika-26 ng Agosto, 2009.
“Sa pagpasa ng RSU Bill sa Senado, inaasahan na lalagdaan ni Pangulong Arroyo ang nasabing panukalang batas upang ito ay maging ganap na batas. Ito ay dapat na mailimbag sa dalawang nasyunal na pahayagan upang maipaalam sa lahat na RSU na tayo,” paliwanag ni Dr. Jeter S. Sespeñe, Pangulo ng Romblon State College.
“Sa Oktubre, sa pagsisimula ng ikalawang Semestre ay magiging ganap ng Unibersidad ang RSC,” dugtong pa niya.

Mga dapat Isaalang-alang

“Syempre, kasabay ng pagiging unibersidad ng RSC ay nakikinita na natin ang pagdaragdag ng mga kurso,” masayang pahayag ni Dr. Jeter S. Sespeñe. Tinitingnan na rin ang mga posibilidad ng pagkakaroon ng mga kursong abogasya, nursing at ang higit na pagpapaunlad ng mga kursong nauukol sa Agrikultura.

Subalit kapalit ng pagbabagong iyon ay dobleng trabaho at pagpupursige para sa mga taga RSC upang maipatulad ang kasuduan o MOA. Sa probisyong nakasaad sa liham ng CHED kay Senador Mar Roxas, nakasaad na “maaaring bawiin ang pagiging unibersidad sakaling di masunod ang mga requirements na sa kasunduan upang mapanaitili ang university status.”

Ayon naman kay Dr. Sespeñe, patungkol sa pagbuwag ng mga satellite campus na nakakalat sa lalawigan kanyang ipinahayag na “Hindi naman tuluyang bubuwagin ang satellite campuses. Sa makatuwdid ay magiging ekstensyon na lamang ito ng Main Campus kung saan magtatalaga ng natatanging field of study. Halimbawa ay gagawing College of Fisheries ang Sta. Maria o di kaya’y College of Agriculture ang San Andres. Nangangahulugan lamang ito na tanging kursong nauukol sa Fisheries o Agriculture ang matitira sa mga nasabing extension campus.

Tunay ngang maraming pagbabago ang magaganap sa pagkakaroon ng kumbersyon. Subalit higit sa mga pagbabagong ito ay ang pagsibol ng isang unibersidad sa kasaysayan ng mga Romblomanon.■
Read more...

Dr. Sespeñe, muling itinalagang Pangulo ng RSC; Pamunuan nahaharap sa samu't saring isyu

Ni Abbygail M. Jaylo

“Masaya ako dahil sa binigyan ako ng ikalawang pagkakataon upang patuloy kong maipakita ang tapat kong serbisyo para sa Romblon State College, sa mga mag-aaral at sa mga guro.”

Bilang pagkilala sa mga nagawang proyekto ni Dr. Jeter S. Sespeñe sa pagpapaunlad ng RSC, siya ay binigyang muli ng ng isa pang termino ng RSC Board of Trustees (BOT) na makapaglingkod bilang Presidente ng Kolehiyo hanggang 2013.

Matatandaang ipinagpaliban ng RSC BOT ang usapin tungkol sa reappointment ni Dr. Sespeñe noong nakaraang Mayo dahil na rin sa direktibang inilabas ng Commission on Higher Education (CHED) na kailangan munang suriin ang mga nagawa ng mga SUC President alinsunod sa kanilang Ten Point Agenda bago sila pagkalooban ng isa pang termino. Ang isang termino ng SUC President ay apat na taon. Sa kaso ni Dr. Sespeñe, ang panrehiyong opisina ng CHED ang siyang naatasang sumuri ng kanyang mga nagawa para sa Kolehiyo sa loob ng nakalipas na halos apat na taon.

Ayon sa Republic Act 8292 o ang Higher Modernization Act of 1997, “In case the incumbent is eligible and qualified per standards set by the governing board (GB) for re-appointment, no search is needed to be conducted at the discretion of the GB. The GB may prescribe the terms and conditions under which the discretion may be exercised such as, but not limited to an evaluation of the performance of the incumbent.”

Noong ika-24 ng Hulyo ng taong ito, isang espesyal na pagpupulong ang ipinatawag ng RSC BOT para sa nabinbing usapin ng reappointment. Dito iprenesenta ng CHED Evaluation Committee ang resulta ng kanilang pagsusuri. Sa 11-pahinang ulat ni Gng. Teotecia C. Taguibao, OIC-Director ng CHED IV-B MIMAROPA, nakasaad na sa apat na taong panunungkulan ni Dr. Sespeñe bilang pangulo ng kolehiyo, mahusay niyang naipatupad ang halos lahat ng mga aytem sa kaniyang Ten Point Agenda.
Samakatuwid, malakas at positibo ang rekomendaysong ibinigay ng Komite na pinangungunahan ni Dr. Taguibao. Kasama dito sina Dr. Dominador P. Peralta, Director IV at Dr. Julieta M. Paras, Education Supervisor II na kapwa mula sa CHED IV-A (CALABARZON).

Sa muling pagkakaluklok ni Dr. Sespeñe bilang Pangulo ng RSC, una sa kanyang mga plano ang pagpapaunlad ng paaralan na malapit ng maging Romblon State University. Bibigyan daw niya ng malaking pansin ang mga Faculty Development Program nang sa ganoon ay mapanatili at mapataas ang antas ng edukasyon at mabigyan ng de-kalidad na edukasyon ang mga kabataang Romblomanon. Tututukan niya rin ang pagpapasaayos ng mga gusali, imprastruktura at mga kinakailangang pasilidad upang maging komportable ang mga estudyante, mga empleyado at mga guro.

Pagtutuunan din daw niya ng pansin ang mga scholarship programs para sa mga matatalino ngunit mahihirap na mga estudyante. Bukod pa dito, nabanggit din ng Pangulo ang nararapat na pagpapanatili at pagpapabuti ng passing percentage ng kolehiyo sa mga government board examination. Hindi naman mawawala sa plano ang pagdaragdag ng mga bagong kurso tulad ng BS Marine Transportation, Criminology, at mga kursong pang- entreprenyur.

Ang Mga Isyu

Halos kasabay naman ng kanyang reappointment ay ang paglabasan ng mga sari-saring isyu laban sa Pangulo, dahilan upang bigyan ng bahid pulitika ang mga isyung ito. Nariyan ang character assassination na nagsimula sa Romblon Post, isang forum sa internet. Sinagot ni Dr. Sespeñe ang mga isyung kumalat sa forum sa pamamagitan ng isang lokal na pahayagan, ang Romblon Sun. Doon, mariin niyang itinuro si Dr. Alexander F. Formento, ang kanyang Vice President for Research, Extension na siya diumanong nagpapakalat ng mga paninira laban sa kanya. Dito nagsimula ang sigalot sa pagitan ng dalawang lider.

Kamakailan nga ay naging headline ng Romblon Sun, ang pagsampa ni Dr. Formento ng anim na magkakahiwalay na kaso sa Ombudsman laban sa nareappoint na Pangulo. Mayroong paglabag daw ang Pangulo sa ilang mga batas gaya ng Anti-Graft and Corruption, Procurement Act, Code of Conduct of Public Employees, malversation of Public Funds, at pagpalsipika ng pampublikong dokumento.

Nananatili namang tikom ang bibig ng Pangulo tungkol sa nasabing mga kaso. Wala pa raw siyang natatanggap na subpoena mula sa Ombudsman. Nauna umano ang paglalathala ng Rsun ng mga isyu tungkol sa kanya nang hindi man lamang hinihingi ang kanyang panig, dahilan upang magkaroon ng mga kuwestiyon sa kanyang pamamahala. Sinabi pa niya na bahala na ang Korte sa pagpapalabas ng katotohanan.■
Read more...

Ligtas pa sa AH1N1 ang Romblon

Nina Christian Mortel at Carl Jonas Opiana

“Walang kumpirmadong kaso ng AH1N1, kahit suspected case wala tayo,” ito ang pahayag ni G. Ralph N. Falculan ng Provincial Health Office tungkol sa napapabalitang pagkakaroon ng positibong kaso ng AH1N1 sa probinsiya.

"Mga ordinaryong influenza lamang ang meron tayo na minsan ay inaakalang AH1N1 flu. Pansariling panlunas lang ang kailangan dito tulad ng personal hygiene. Sa mga may sintomas, yung mga binabantayan lamang namin ay yung mga high-risk patient kagaya ng mga buntis o may mga malubha o kumplikadong karamdaman. Huwag kayong maniwala sa mga bali-balita lalo’t higit kung walang basehan ang mga ito. Tayo lamang ang wala pang naitatalang kaso ng AH1N1 sa MIMAROPA kaya ligtas pa ang Romblon," dagdag pa niya.

Mas mabahala pa raw dapat ang mga tao sa nakamamatay na dengue dahil may ilang kaso ng naitala dito sa ating probinsya.

Bagama’t ligtas pa ang Romblon sa ngayon, preparado naman daw ang pamunuan ng Romblon Provincial Hospital kung sakaling may magpositibo sa naturang sakit. Nagsanay at nakahanda na ang mga doktor pati na rin ang mga kagamitan tulad ng mga gloves, masks at ang mga swabs galing pa sa Research Institute for Tropical Medicine sa Alabang. Nagsagawa na rin ng kampanyang Iwas AH1N1 ang mga health center ng probinsya. Ito’y sa pamamagitan ng mga information campaign. Ayon sa mga nurse na nakatalaga sa Health Center ng Odiongan, may programa ang lokal na pamahalaan na Barangay Health Emergency Response Team Service. Minomonitor at inaalam ng pangkat ang kalusugan ng mga taong pumapasok ng probinsya sa pamamagitan ng pagbibigay ng mga survey form.

“Ang ating probinsya ay hindi na naghihintay pa na makapagtala ng kaso ng AH1N1. Gumagawa na tayo ng mga paraan upang hindi na umabot pa ang sakit na ito dito sa atin,” komento ng Information Officer sa Opisina ng Gobernador .

Ayon naman kay Dr. Rembert S. Chavez, Medical Officer III ng RSC, ”Walang dapat ipangamba sa naturang sakit. Kailangang panatalihin lang nating laging malakas ang ating resistensya.”

Matatandaan na ang AH1N1 na isang malakas na strain ng swine flu virus ay naging malaking pangamba sa lahat ng tao sa mundo at maging sa Pilipinas dahilan upang maurong ang pagbukas ng mga eskwelahan noong nakaraang Hunyo. Batay sa pinakahuling tala ng World Health Organization nitong nakaraang Hulyo, umaabot na sa 162,380 katao kumpirmadong may AH1N1 at 1,154 na ang namatay sa iba’t ibang panig ng mundo dahil dito.
Read more...